O Pizziceju mio, comu si caru
subbra stu scogghiu chi sdarrupa a mari:
lu Papaternu non guardau dinaru
pemmu ti faci comu seppi fari.

Ti dezzi 'u suli deci misi l'annu
mu ti caddija e mu ti dà splenduri;
li stij nda lu celu chi ti fannu
quandu li guardi pemmu t'annamuri.

La luna faci poi na scena a parti,
sia quandu cala oppuru quandu spunda;
quand'esti tunda oppuru s'esti a quarti:
quali poeta sapi mu lu cunda?

Lu mari pari na specchiera grandi
di nu salottu nobili 'i na vota
e tu, mundagna, chi aria chi ngi mandi
di li toi vosca chi ngi stannu a rota!

Lu stromboli saluta di lundanu:
lu fumu jancu d'ogni sua pippata
pari nu maccaturi chi na manu
svendula allegru tutta la jornata.

Cu veni ccà s'incanda a prima vista
e grida tuttu assai meravigghiatu:
Oh! chi benedizioni ch'esti chista;
o pizzitanu, tu sì fortunatu!

Non la sciupari tutta sta ricchizza:
tènila stritta, falla pemmu crisci...
La testa sana sana mu ngi appizza
cu faci ca no sendi o no capisci!

David Donato